ភ្នំពេញ៖ សមាជិកសភាលោក ហ៊ុន ម៉ានី បានបង្ហោះសារមួយនៅទិវាកុមារអន្ដរជាតិ ១ មិថុនានេះ ថាលោកចូលចិត្តឃើញស្មាមញញឹមរបស់កុមារ និងសំរ៉ែហៅថាប៉ាពីកុមារ ដែលថាជាំកម្លាំងចិត្តឱ្យលោកខិតខំបន្ថែមទៀតដើម្បីជួយដល់ការកសាងអនាគតកុមារនៅកម្ពុជា។

លោកបានសរសេរថា៖ «ប៉ានឹកកូនម្តងៗ ប៉ាចង់រុញពេលវេលាឲ្យលឿន ដើម្បីប៉ាអាចផ្តល់អាទិភាពការងារ ដើម្បីបានជួបកូនៗ។ ស្នាមញញឹម សម្លេងយំខ្សឹកខ្សួល និងសម្រែកហៅប៉ាពីចម្ងាយ ជាឱសថសម្រាលបន្ទុកការងាររបស់ប៉ាផង និងជាកម្លាំងចិត្តឲ្យប៉ាប្រឹងប្រែងបន្តផង ដើម្បីកូនៗ និងកុមារកម្ពុជាយើងទាំងអស់។ ប៉ានឹងនៅជាមួយកូនៗរហូត!»។

លោកក៏បានអរគុណដល់អង្គការផ្ទះបាយកុមារដែលបានបំពេញភារកិច្ចជួយដល់កុមារកម្ពុជា។

ទិវាកុមារអន្តរជាតិគឺជាថ្ងៃរំលឹកខួបដែលប្រារព្ធជារៀងរាល់ឆ្នាំដើម្បីជាកិត្តិយសដល់កុមារដែលកាលបរិច្ឆេទនៃការប្រារព្ធពិធីនេះប្រែប្រួលទៅតាមប្រទេស។ ទិវានេះត្រូវបានប្រកាសជាលើកដំបូងនៅឆ្នាំ១៩២៥ នៅទីក្រុងហ្សឺណែវក្នុងអំឡុងសន្និសីទពិភពលោកស្តីពីសុខុមាលភាពកុមារ៕